Serikali yasema ipo tayari kutoa ushirikiano kwa wadau wa maji na usafi wa Mazingira -TAWASANET

Serikali imesema ipo tayari kutoa ushirikiano kwa TAWASANET, wanachama wake na wadau wengine wanaofanya kazi katika sekta ya maji na usafi wa mazingira ili kujenga misingi ya uadilifu, uweledi na uwajibikaji miongoni mwa Asasi zisizo za Kiserikali.

Hayo yamesemwa leo hapa mjini Dodoma na Naibu Katibu Mkuu Ofisi ya Rais Tawala za mikoa na Serikali za Mitaa ( TAMISEMI )Tickson Nzunda, wakati akifungua mkutano wa siku mbili wa wadau katika Sekta ya maji na Usafi wa Mazingira.

Amesema Serikali  inatambua na kuthamini jitihada zinazofanywa na Asasi za Kiraia na wadau wa maendeleo katika kujenga na kuimarisha masuala ya uwajibikaji kwenye ngazi ya Jamii huku akiwaasa kutumia rasilimali chache walizonazo kwa maslahi na malengo ya taasisi na siyo maslahi ya mtu binafsi.

Ameongeza kwamba ni muhimu wadau wote kusaidiana na Serikali katika kutekeleza malengo ya Serikali kwa kuzingatia vipaumbele vya Serikali ambavyo ni ujenzi wa Miundombinu ya maji, utunzaji na uhifadhi wa vyanzo vya maji na usafi wa mazingira.

Kwa upande wake Mwenyekiti wa TAWASANET , Herbet Kashilila amesema  mkutano huo unalenga kubadilishana uzoefu baina ya taasisi mbalimbali hasa kwenye dhana ya uwajibikaji wa jamii katika kuonyesha majukumu na wajibu wa kila ngazi katika utawala wa Serikali.

Mmoja wa wadau wanaoshiriki katika mkutano huo kutoka shirika la Plan International kupitia mradi wa usafi wa mazingira Tanzania ( UMATA ) Lydia Mcharo amesema mkutano huo utawasaidi kutafuta njia nzuri  ya ushirikiano katika kutimiza na kutekeleza malengo ya Sekta ya Maji na Usafi wa mazingira.

Mkutano huo wa siku mbili umeandaliwa na TAWASANET ukiwajumuisha wadau kutoka taasisi na mashirika mbalimbali ambayo hujiusisha na sekta ya maji pamoja na usafi wa mazingira hapa nchini.

Share on Google Plus

About NYEMO FM RADIO