Mavunde - Mgambo acheni kuwacharaza bakora Wafanyabiashara Soko la Majengo Dodoma

BAADHI ya wafanyabiashara wa soko kuu la Majengo mkoani Dodoma wanaofanya biashara nje ya soko wameangua vilio mbele ya Naibu waziri wa kazi,ajira na vijana Antony Mavunde kwa kile walichodai kuwa wamekuwa wakichapwa viboko na baadhi ya kikosi cha mgambo wa manispaa ya Dodoma.

Soko kuu la Majengo mkoani Dodoma ni miongoni mwa masoko kongwe yaliyopo mkoani hapa ambapo lilijengwa miaka ya 1996 lakini chakushangaza ni kuwepo kwa madai ya wafanyabiashara hao kuchapwa viboko na mgambo wa manispaa.

Wakizungumza kwa masikitiko wafanyabiashara hao wamesema kuwa wamekuwa wakinyanyaswa na migambo ambao wamekuwa wakiwapiga na kuwadhalilisha huku wakitumia nafasi hiyo kuiomba serikali kuwatafutia eneo mbadala la kufanyia biashara zao.

Akijibu kero za wananchi hao diwani wa kata ya Majengo Msinta Mayaoyao amesema halmashauri ya manispaa ya Dodoma wametenga fedha kwa ajili ya kujenga masoko ya kisasa ili kuwasaidia wafanyabiashara kupata maeneo mazuri ya kufanyia biashara.

Akizungumzia kuhusiana na kitendo cha wafanyabiashara kuchapwa fimbo na mgambo Naibu waziri wa kazi,ajira na vijana Antony Mavunde ambaye pia ni mbunge wa jimbo la Dodoma amewataka mgambo hao kuacha vitendo hivyo kwani ni kinyume cha sheria.

Na Nazael Mkiramweni 

Share on Google Plus

About NYEMO FM RADIO