Mradi wa Afya Kinga mkoani Dodoma wasaidia wananchi kujikinga na magonjwa mbalimbali ya mlipuko

Mwakilishi wa Idara ya Jamii kutoka halmashauri ya Kondoa Vijijini John Tesha amesema utekelezaji wa mradi wa Afya Kinga mkoani Dodoma umesaidia kuongeza uelewa kwa wananchi kuzingatia masuala ya usafi na hivyo Katika kujikinga na magonjwa mbalimbali ya mlipuko.

Ameeleza hayo hapa mjini Dodoma wakati akizungumza na waandishi wa habari mara baada ya kuhitimishwa kwa mkutano wa siku mbili wa Mkoa wa Uratibu wa Afya Kinga.

Amesema kupitia utekelezaji wa mpango huo wananchi katika ngazi ya vijiji na vitongoji imekuwa rahisi kwao kupata elimu ambayo imewawezesha kujua jinsi ya kujikinga na magonjwa mbalimbali ikiwemo kufahamu   namna ya kujenga vyoo bora na kuvitumia,kutengeneza vifaa vya  kunawa mikono watokapo chooni kwa njia ya maji yanayotiririka na sabuni.

Naye Mganga Mkuu wa Halmashauri ya Kondoa Dokta Ikaji Rashid amesema mradi huo umekuwa na mafanikio makubwa sana kwa upande wa idara ya afya.

Kwa upande wake Afisa Afya Mkoa  Carl Lyimo ameshukuru HPSS kupitia mradi wa Tuimarishe Afya kwa kutekeleza kwa vitendo kauli ya Kinga ni Bora Kuliko Tiba na kusema kwa muda mrefu eneo hilo halijafanyiwa kazi kwa kupewa kipaumbele na hata lilipopewa kipaumbele halijafanyika kwa utaratibu  unaokubalika tofauti na hali ya sasa mkoani Dodoma.

Mkutano huo umeratibiwa na Ofisi ya Mganga Mkuu wa mkoa wa Dodoma kwa kushirikiana na Mradi wa HPSS unaofadhiliwa na Shirika la Maendeleo la Uswisi(SDC).

Share on Google Plus

About NYEMO FM RADIO