Miundombinu isiyo ya Uhakika na Ukosefu wa Pedi vyatajwa kuwa chanzo cha Utoro kwa watoto wa Kike mashuleni

Kutokuwepo kwa miundombinu ya uhakika na ukosefu wa pedi za kujisitiri kwa watoto wa kike pindi wananapokuwa katika hedhi kumeonekana kuchangia watoto kushindwa kuhudhuria masomo katika shule ya Sekondari Mwanzi iliyopo wilayani Manyoni.

Katika kutatua changamoto hiyo shirika lisilo la kiserikali CAMFED kwa kushirikiana na wizara ya elimu na mafunzo hapa nchini imetoa msaada wa vifaa mbalimbali kwa watoto 60 wa kike  waishio katika mazingira magumu.

Akikabidhi msaada huo Mbunge wa jimbo la Manyoni Mshariki Daniel Mtuka amesema gharama ya vifaa vyote ni milioni 13 na laki 8 hivyo amewataka wazazi kutozitumia baiskeli na vifaa vingine kwa manufaa yao bali vitumike kama ilivyo lengwa ili viwanufaishe wanafunzi hao.

Vilevile mbunge huyo amewasisitizia watoto hao wa kike kusoma kwa bidii na kukaa mbali na mambo mengine ya anasa ili kutimiza ndoto zao Kimaisha.

Kwa upande wake diwani wa kata ya Manyoni Magembe Machibula amewasisitiza wazazi wa watoto hao kushirikiana na watoto wao kutunza vifaa walivyopokea.

Naye mkuu wa shule ya Sekondari Mwanzi Janeth Lubas  amelishukuru shirika hilo kwa msaada huo na kwamba utasaidia kupunguza utoro shuleni hapo.

Esteria Nathan mwanafunzi wa kidato cha nne katika shule hiyo kwa niaba ya wanafunzi wenzake amesema kupitia msaada huo jamii itegemee matunda mazuri kutoka kwa wanafunzi wa shule hiyo.

Share on Google Plus

About NYEMO FM RADIO